Numbers 24
1À nà n-ghɨ ta Balàm yeyn kèli samoʼ na Bôbo Fɨyini nɨ̀n kɨŋ na wù boysɨ boysɨ ghelɨ Isìlæ̀, wu faŋ tɨ̀ fì tɨ̀ ndù sɨ fyeŋ ta wù nà n-ndû fyêŋ sɨ asɨ ɨ kwo bèynsɨ̀ ìkêʼ i ŋweyni ɨ nà ki ndùsɨ̀ dzɨ a nse iyum. 2Wu n-ki ndùsɨ ɨ yeyn ghelɨ Isìlæ̀ ma ghɨ bɨ̀ kɨ̀ isas i ndo isas i ndo, ayvɨs a Fɨyini à ɨ gvì sɨ̂ ŋweyn, 3wu nà sɨ làʼì ntûm bê na,
ɨyêyn nɨn ghɨ ntum Balàm ɨ wâyn Beyò,
ɨ ntûm wùl ɨ̀ vzɨ̀ a wù n-faytɨ yeyn awo,
4ɨ ntum wùl ɨ̀ vzɨ̀ a Fɨyini fɨ nɨn taŋi wu yvɨ a,
yeyn àwo kì a Bò ɨ̀dwaʼ ɨ̀ jɨ̀m nɨn dyêyn sɨ̀ ŋweyn a jêm.
Wù nyɨŋì a nse àkfɨ̀ akfɨ wu nà yeyn àwo.
5Mɨ̀two mzɨ̂ nɨ̀n njofà a woyn Jàkôb,
mɨ̀two mzɨ̀ a yi n-chi ateyn a ghelɨ Isìlæ̀ nɨ̀n njofà.
6Mɨ̀two mzɨ̂ nyìŋì ndù kɨ ta ibal,
ghɨ kɨ ta gveynsɨ a mbæ̀ jvà,
ghɨ kɨ ta ɨnkâʼ ɨ̀n jùŋ ɨ̀n lì ma à yèl Bôbo Fɨyini,
fî ghɨ kɨ ta ɨnkâʼ mɨ̀ sedà a mɨ̀ n-lema a mbæ̀ jvà.
7Mû læ̀ nà lum ghɨ kɨ ghɨ a yi a ntòynsɨ̀,
ngœ̀ zɨ læ̀ nà kelɨ mû mɨ dvɨ̂ kɨ tèyn
fòyn àŋena læ̀ nà koʼnɨ̂ chwô fòyn Agàg,
ghɨ læ̀ nà ngvɨmlɨ̂ ɨ̀foyn ŋweyn.
8Fɨyini fɨ nɨn fvɨsɨ meyn àŋena sɨ a Ijìb,
nà nû alèʼ nɨ̀ àŋena ta mbòŋ ɨ̀twaʼ,
àŋena nɨn tɨm yɨ mbàynɨ̀ sîsɨ̀ a sɨ n-nû àŋena,
ɨ̀ zuèlɨ ɨ̀vɨf àŋena,
fì tɨ̀mlɨ àŋena nɨ̀ àwoŋa.
9Ghelɨ Isìlæ̀ nɨn ghɨ ta nyam àbo,
ma wùl ɨ̀ kàʼ wu bû mòm sɨ làysɨ̀ ɨlvɨ ta yì n-buni.
Fɨyini fɨ nɨn boysɨ̂ nô mɨ ndà vzɨ̀ a wù bòysɨ ghelɨ Isìlæ̀
ɨ̀ tè nô mɨ ndà vzɨ̂ a wù tè ghelɨ Isìlæ̀.
10Balàm nɨn taŋi mèsi nô mɨ ɨlvɨ gha, ɨtoŋ Balàk ɨ yaf nô sɨ a ŋaŋ, wu buʼ ɨwu ɨ bè sɨ̂ Balàm na, “Mà tî jàŋ và na wà gvi màʼ ngeʼ atu nɨ̀ mbàynɨ̀ semsɨ, wà gvî ɨ̀ kwo bòysɨ boysɨ àŋena ìngal ì tal. 11Lu kɨ lvɨ̂yn ɨ nà kfâ! Mà tî bè na mɨ n-faytɨ̂ lâʼ kɨ nô làʼ vâ, mɨtì Bôbo Fɨyini faŋ tɨ̀ vìsi na mà laʼ vâ.”
12Balàm ɨ bèynsɨ̀ ɨ bè sɨ̂ Balàk na, “Ba mɨ n-læ meyn bè sɨ̂ ghelɨ ntum ghì a wà n-læ tum sɨ̂ mà a na, 13‘Balàk kæ fu nô mɨ ntoʼ ŋweyn sɨ̂ mà, ma yì luyn meyn nɨ̀ àso ɨkwo a fɨfâ nɨ̀ a baŋnɨ-a, ma bû to nɨ̀ àtu a sɨ̂ Bôbo Fɨyini sɨ ni iwo i juŋì kèsa i bzɨ-i bula wù bê. Mɨ n-kelɨ sɨ be kɨ iwo zɨ̀ a Bôbo Fɨyini bè na mà be.’ 14Mɨ n-kasî ndû sɨ yeyn ghelɨ̀ ghem lvɨ̂yn, mɨtì mɨ n-se sɨ lù ma ma feʼtɨ meyn ìwo zɨ̀ sɨ̂ và a ka ghelɨ Isìlæ̀ læ̂ nì sɨ̂ ghelɨ̀ ghya.”
Balàm ɨ fi làʼi kfeynsɨ ntum ì lì
15Balàm nɨn taŋi tî ɨ bè sɨ̂ Balàk na,
“Ɨyêyn nɨn ghɨ ntûm Balàm ɨ wâyn Beyò.
Itaŋi i wul ɨ̀ vzɨ̀ a wù n-faytɨ yeyn nô a jûŋ,
16ɨ ntûm wùl ɨ̀ vzɨ̀ a wù yvɨ iwo zɨ̀ a Fɨyini fɨ nɨn bê.
Mɨ n-kya àwo ma à fèʼtɨ̀ Fɨyini fìfɨ̀ a fɨ ngàŋtɨ chwò.
Mɨ n-nyɨŋì-à asɨ à kema yàsì,
ɨ jem ma yì lù sɨ̂ Bò ɨ̀dwaʼ ɨ̀ jɨ̀m.
17Mɨ n-ki yeyn ìwo ɨtuʼ ateyn ɨ ghɨ sɨ jæ gvì. Mɨ n-yeyn ìlaʼ i Isìlæ̀, fòyn ɨ̀lvì ɨ ghɨ ta fɨnjêyn, fɨ bayn nô sɨ a ŋaŋ ɨ ghɨ sɨ læ sɨ koʼ achɨ ilaʼ nâ ghè, wu n-fvɨ̀ antêynɨ̀ nɨ̀ woyn Jàkôb, ɨ̀ zuètɨ ghelɨ ghɨ tisɨnɨ a Mowàb, wu n-mèsì woyn Sêt nô ghɨ̀ jɨ̀m.
18Ghelɨ Isìlæ̀ nɨn tɨm yɨ mbàynɨ̀sɨ àŋena a Edòm. Ghelɨ Isìlæ̀ nɨn ghaytɨ̂ fsɨtɨ̂ nse ìlaʼ i Siyà, Isìlæ̀ na tɨm yɨ kɨ yɨ.
19Wùl nɨn fvɨ̀ antêynɨ̀ nɨ̀ woyn Jàkôb ɨ̀ saʼ Isìlæ̀. Wu n-mèsì ghelɨ ghì a ghɨ bu chi a ntèʼ nâ ghè.”
Balàm ɨ làʼì ntum ì goʼsɨnɨ
20Balàm nɨn yeyn meyn ghelɨ Amalèk ta wù yèyn a jêm ɨ làʼì ntum yèyn sɨ̂ àŋena:
“Amalèk nà n-ghɨ ìlaʼ i yi asɨ-i sɨ nu ghelɨ Isìlæ̀ antêynɨ̀ tɨ̀laʼ,
mɨtì a nì nà ghɨ a ngòʼsɨ a Fɨyini fɨ bebsɨ ilaʼ ateyn kɨ̀ samoʼ.”
21Balàm nɨn yeyn meyn kɨmɨ ghelɨ Kên ta wù yèyn a jêm ɨ làʼì ntum yèyn na:
“Alêʼ kì a yi n-chi ateyn nɨn ghɨ ma ghɨ faytɨ meyn kɨ̀ŋtɨ̀,
ghɨ kɨ ta ndô fɨ̀nyuyn iwu.
22Mɨtì ghelɨ Ashù nɨn tɨm yɨ zɨ̀ ghelɨ Kên, ɨ̀ bèbsɨ ìlaʼ ì zɨ-i.”
23Balàm ɨ fi làʼì ntum yèyn na,
“À ti kàʼ a bœ̀ nô ndà ɨlvɨ ta Fɨyini fɨ nì awo nâ kèynà a?
24Ngùʼsɨ læ̀ lû nɨ̀ ghelɨ a mbæ̀ jvà a Kitìm ɨ̀ gvì tɨm yɨ̀ ghelɨ Ashù nɨ̀ ghelɨ Ebà. Mɨtì a Fɨyini fɨ boŋ bèbsɨ ìlaʼ i àŋena kɨ̀ samoʼ.”
25Balàm nɨn læ làʼi mèsi ntum ŋweyn nô mɨ ɨlvɨ gha ɨ kasi nà kfâ, Balàk ɨ boŋ lù.