Numbers 25

Ghelɨ Isìlæ̀ ɨ koʼsɨ ɨ̀nfyèʼsɨ̀ ɨ Bâl a Beyò

¹À nà n-ghɨ ta ghelɨ Isìlæ̀ bɨ̀ a Shitìm, ghɨ̀lûmnɨ Isìlæ̀ ghɨ li ɨ nà sɨ chî nɨ̀ ghɨ̀ki Mowàb. ²Ghɨ̀kì nâ ghì ɨ nà làʼì àŋena sɨ ifu ghè a àŋena nà n-fu sɨ̂ mɨyini mɨ̀ àŋena, ŋêyn àŋena ndù ɨ nà koʼsɨ̂ mɨyini mɨ̀ àteyn fî yɨ ɨ̀fwo ɨ yɨnɨ vzɨ̀ a ghɨ yɨ afu. ³À ti ta ghelɨ Isìlæ̀ nɨ̀n læ chɨ̀yntɨ̀ ŋêyn ghelɨ Mowàb ɨ nà koʼsɨ̂ ɨ̀nfyèʼsɨ̀ ɨ Bâl a Beyò. Iwo ateyn i ɨ nì Bôbo Fɨyini ɨ nyòʼsɨ̀ ɨ̀toŋ sɨ̂ àŋena nô sɨ a ŋaŋ. ⁴Bôbo Fɨyini nɨn nyòʼsɨ ɨtoŋ tî ɨ bè sɨ̂ Mosìs na, “Lì ghelɨ ghɨ tisɨnɨ nɨ̀ ghelɨ ghèyn nô ghɨ̀ jɨ̀m a ghɨ n-koʼsɨ mɨyini mɨ̀ Bâl ɨ zuetɨ àŋena a ndayn kɨ̀ ta mà bè. Wa n-zuetɨ-à a mà faŋ tɨ̀ fì tɨ̀ nyòʼsɨ ɨtoŋ sɨ̂ ghelɨ Isìlæ̀.”

⁵Mosìs ɨ kæ bè sɨ̂ ghelɨ ghɨ tisɨnɨ a Isìlæ̀ na, “Nô mɨ ndà a yi antêynɨ̀ nɨn kelɨ sɨ zuetɨ ghelɨ isas i ndo nɨ̀ àŋena ghì a ghɨ chɨ̀yntɨ̀ nà koʼsɨ ɨ̀nfyèʼsɨ̀ ɨ bâl a Beyò.”

⁶Mosìs nɨn taŋi tî, ghelɨ Isìlæ̀ nà bu ti kɨ ɨchfɨ fɨndo nɨ̀ Bôbo Fɨyini dzɨ-à, wul ɨ̀ Isìlæ̀ ɨ̀lvɨ ɨ gvì nɨ̀ wùl ɨ wi Midìyàn ɨ zɨ nɨ̀ ŋweyn a ŋweyn ɨtwò kɨ̀ nô asɨ nɨ̀ Mosìs ŋêyn ghelɨ Isìlæ nô ghɨ̀ jɨ̀m. ⁷À nà n-ghɨ ta Finehàs yeyn iwo ateyn, wu fvɨ̀ sɨ antêynɨ̀ nɨ̀ ghelɨ Isìlæ̀ ɨ ndu lì ìwoŋ ŋweyn. Finehàs nà n-ghɨ wâyn Elezà, Elezà ɨ ghɨ wâyn Alòyn ɨ ngàŋ ndô Fɨyini. ⁸Wu n-lì tî, ɨ jùmtɨ̀ ɨ ndù nɨ̀ wùl ɨ lûmnɨ̀ nâ vzɨ̀ ɨ zɨ a ŋweyn ɨtwò ɨ chuʼ ŋweyn nɨ̀ ìwoŋ i yi toynɨ ɨ zɨ ɨwùyn nɨ̀ wul ɨ wi àteyn àŋena kfɨtɨ. Wu n-nì tî nô mɨ ɨlvɨ gha, ngeʼ sìsɨ̀ a sɨ nà n-ghɨ antêynɨ̀ nɨ̀ ghelɨ Isìlæ̀ ɨ mæ. ⁹Ngeʼsɨ ateynsɨ nɨn se sɨ mæ̀, ma ghelɨ Isìlæ̀ sɨ ghɨ ma ghɨ kfɨtɨ meyn nkam mɨ̀vɨm ɨ̀m bò njvàsɨ̀ kæ̀.

¹⁰Bôbo Fɨyini ɨ bè sɨ̂ Mosìs na, ¹¹“Finehàs ni meyn ma na bu nyòʼsɨ̀ wì ɨtoŋ sɨ̂ ghelɨ Isìlæ̀ bòm ta wù bu tî bɨ̀mi na ghelɨ Isìlæ̀ na koʼsɨ̂ mɨyini ɨ mɨ̂nlù a bu kɨ mà. À ti iwo zɨ̀ a mà tî faŋ tɨ̀ fì tɨ̀ zuètɨ ghelɨ Isìlæ̀ ta mà tî nà kɨŋ sɨ zuetɨ. Finehàs nà n-ghɨ wâyn Elezà, Elezà ɨ ghɨ wâyn Alòyn ɨ ngàŋ ndô Fɨyini. ¹²Bè sɨ̂ Finehàs na mɨ n-yɨ mɨkâyn ghesɨ̀ ŋweyn sɨ nà chi nɨ̀ mbôynɨ̀ bòm ìwo zɨ̀ a wù nì kɨ̀ sɨ a mɨlvɨ ɨ̀n jɨ̀m. ¹³Mɨ̀kâyn nâ mèyn nɨn ghɨ na, Finehàs ŋêyn woyn ŋweyn na ghɨ ngàŋsɨ ndô Fɨyini kɨ̀ sɨ a mɨlvɨ ɨ̀n jɨ̀m bòm ta wù bu tî bɨ̀mi na ghelɨ Isìlæ̀ na koʼsɨ̂ mɨyini ɨ mɨ̂nlù a bu kɨ mà. Wù n-fi meyn nì ma lèsɨ fu mbɨsɨ ghelɨ Isìlæ̀.”

¹⁴Izɨyn i wul ɨ̀ Isìlæ̀ vzɨ̀ a Finehàs nɨn læ zue ŋêyn wùl ɨ wi Midìyàn vzɨ̀ nà n-ghɨ Zimlì ɨ wâyn Salù. Salù nà n-ghɨ wul ɨ tisɨnɨ ɨchfɨ ndo ɨlvɨ isas i ndo nɨ̀ Simìyòn. ¹⁵Izɨyn i wûl ɨ wi Midìyàn nâ vzɨ̀ a ghɨ n-zue nà n-ghɨ Kozbì ɨ wâyn Zûl. Zûl nà n-ghɨ wul ɨ tisɨnɨ ɨchfɨ ndo ɨlvɨ isas i ndo nɨ̀ ghelɨ Midìyàn.

¹⁶Bôbo Fɨyini nɨn be meyn sɨ̂ Mosìs na, ¹⁷“Yì nu ɨ̀ zuetɨ ghelɨ Midìyàn nô ghɨ̀ jɨ̀m, ¹⁸bòm ìnyâblɨ̀ zɨ̀ a àŋena tî nyàblɨ nɨ̀ zɨ̀ a Beyò ɨ̀ lɨ̀sɨ zɨ̀ yi na koʼsɨ̂ ɨ̀nfyèʼsɨ Bâl. A fî ghɨ kɨmɨ bòm jêmtɨ̀ àŋena ɨ Kozbì vzɨ̀ a ghɨ n-zue a mɨchi ghè a ghelɨ Isìlæ̀ nà n-ghɨ a ngeʼ bòm ìwo zɨ̀ a yi n-gàyn a Beyò. Kozbì nà n-ghɨ wayn wùl ɨ tisɨnɨ a Midìyàn.”